Íslenzkar þjóðsögur og æfintýri/Galdrasögur/Draumvísur Jóns á Brekkukoti
Draumvísur bóndans Jóns Þorvaldssonar á Brekkukoti í Svarfaðardal, sonur nafnkennds bónda Þorvaldar á Sökku í sömu sveit. Hann var skáldmæltur og dreymdi eina nótt að hann var staddur á Akureyri í kauptíð og verzlaði með vöru sína við kaupmann Hemmert og þótti honum hann hafa af sér í kaupunum, og yrtust í illu þar til að Jóni þótti hann reiðast og kveða í svefninum:
- Óska ég búðin héðan há
- hverfi nú á samri stund
- með bezta skrúð sem bragnar sjá
- á bakkann fyrir neðan Grund.[1]
- Kannske að þér kaupmaður
- kynnuð smeykir verða þá
- og kæfðuð niður kappræður
- ef kæmist áfram leikur sá.
- Ætti ég ei fyri sálu að sjá,
- sannarlega ég fæ það rætt,
- þetta skyldi framgang fá
- so flestum yrði minnisstætt.
Hann þóttist hafa gert fjórar, en mundi ekki þá seinustu þá hann vaknaði. – Þetta var um miðja 18. öld eður litlu síðar.
- ↑ Bær nærri Brekkukoti. [Hdr.]