Íslenzkar þjóðsögur og æfintýri/Galdrasögur/Reynisvatn
Reynisvatn heitir bær einn í Mosfellssveit; hann dregur nafn af stöðuvatni því sem þar er rétt við túnið og af manni þeim sem þar bjó fyrstur og hét Reynir. Reynir bóndi hafði smiðju sína langt frá bænum fyrir handan vatnið undir svokölluðum Nónás. Varð hann að krækja öðruhvorumegin við vatnið þegar ekki lá ís á því til að komast í smiðjuna. En í vatninu var afbragðs silungsveiði. Einu sinni um vetur þegar vatnið var farið að leggja ætlaði Reynir að stytta sér leið og ganga vatnið til smiðjunnar, en vök var á vatninu og drukknaði hann þar. Dóttir Reynis var stödd úti og sá ófarir föður síns; henni varð skapbrátt af því hún gat ekki hjálpað honum, og lagði á vatnið að allur silungurinn í því skyldi verða að pöddum og hornsílum, og hafa þau ummæli haldizt síðan. En það er frá bóndadóttur að segja að hún tók til fótanna eftir ummæli sín, hljóp í sömu vökina sem faðir hennar fórst í, og týndi sér þar.