Íslenzkar þjóðsögur og æfintýri/Goðfræðisögur/Dagný álfkona

Íslenzkar þjóðsögur og æfintýri
Dagný álfkona

Helgi er maður nefndur; á hvaða bæ hann var vita menn ekki. Hafði hann það handverk að smíða spæni úr hornum. Eitt sinn sat hann í fjósdyrum sínum og var þá að tegla horn til spóna og vissi ekki að nokkur væri í fjósinu. Kom þá kvenmaður til hans og kvað þennan kveðling:

Heyrðu mér Helgi

sem horn þitt telgir,

segðu henni Dagnýju að dauður sé hann Arnþór;

vaggan hún vagaði og valt fram á eldinn.

Heyrði hann þá þrusk inn í fjósinu; brauzt þá út kona mjög ferðmikil með eirfötu í hendi. Er meining manna að móðurin hafi verið að fá mjólk inn í fjósinu, en barnið hafi dottið í eldinn af vangæzlu vinnukonunnar og brunnið til bana.