Íslenzkar þjóðsögur og æfintýri/Goðfræðisögur/Grýluþula

Íslenzkar þjóðsögur og æfintýri
Grýluþula

Grýla er að vísu

gömul herkelling;

bæði á hún bóndann

og börnin tuttugu:

Fyrsti Skreppur,

önnur Skjóða,

þriðji Þröstur

og Þrándur hinn fjórði,

Botni, Brynki,

Böðvar, Höttur,

Stútur, Stefnir,

Stikill, Flaska,

Ausa, Askur,

Koppur, Kyppa,

Musull, Mukka.

Ól hún í elli

enn tvíbura

Sighvat og Surtlu

sem sofnuðu bæði.

Grýla kallar á börnin sín

þegar hún fer að sjóða til jóla.

Komi þið hingað öll til mín.

Leppur, Skreppur, Langleggur og Skjóða,

Brytjaðu Leppur bóg af nauti,

bjarndýrslær og þjó af kú,

kapalshrygginn býsna blautan,

bringukollinn og lendabú,

sauðarkrof og selinn feita

og svínsskammrif nokkuð fín.

Grýla kallar á börnin sín.

Þó mun ekki af þessu veita

ef þiggjum máltíð góða,

Leppur, Skreppur, Langleggur og Skjóða.

Sæktu vatnið síðan Skreppur,

sjálf hún Grýla mælti þá.

Undir láta lízt mér Leppur,

laglega það fara má.

Sjálf er ég eins og sigakeppur

og svo er líka hún Skjóða mín.

Grýla kallar á börnin sín.

Ef mér fótur óvart sleppur

upp þá gjöri ég hljóða,

Leppur, Skreppur, Langleggur og Skjóða.

Nú skal Leppur sjálfur sjóða,

sá það verkið dável kann.

Ketilinn Skreppur hefur til hlóða

og hellir á barma staðfullan.

En undir kynda á hún Skjóða

með úlfgrátt hár og síðar brýn.

Grýla kallar á börnin sín,

en Langleggur á að bjóða

öllu liðinu fróða,

Leppur, Skreppur, Langleggur og Skjóða.

Grýla reið fyrir ofan garð,

vildi finna Þorvarð;

með skorpinn fisk og skötubarð

skaut hún hann í Þorvarð.

Stígum við stórum

stundum til grunda.

Belg ber ég eftir mér

barnanna fulla

Hér læt ég skurka

fyrir skáladyrum:

„Vaknaðu gýgur.“

Ei vill gýgur vakna.

„Er framorðið?“

„Sól á milli augna þinna,

sofa máttu lengur

einn dúrinn drengur.“

„Hver er kominn úti?“

„Björn á brotnu skipi.“

„Hvað vill Björn?“

„Biðja um nálar.“

„Hvað vill Björn með nálar?“

„Að sauma segl.“

„Hvað gengur að segli?“

„Slitið af veðri.“

„Hvað gjörði hann við nálarnar

sem ég fekk honum í fyrragær?“

„Hann [gaf] Hala bróðir.“

„Hvað gjörði Hali við?“

„Kastaði út á miðja götu og sagði

að brenna skyldi á baki þeim sem ætti“

„Hvað ertu að segja núna?“

„Ég er að syngja á tölur mínar,

gott barn, því heilagt er á morgun.“