Íslenzkar þjóðsögur og æfintýri/Viðburðasögur/Marteinslaugar

Úr Wikiheimild
Jump to navigation Jump to search
Íslenzkar þjóðsögur og æfintýri  (1862) 
þjóðsaga, ritstjóri Jón Árnason

Fáein atvik eru það enn sem hafa borið við um það leyti sem siðabótin var að komast á hér í landi og einstöku örnefni draga þar af nafn. Svo eru til dæmis Marteinslaugar hjá Haukadal í Biskupstungum sem eiga að vera einkar heilnæmar ef maður baðar sig í þeim. Sagt er að Marteinn biskup Einarsson hafi baðað sig þar fyrstur manna veturinn sem hann sat í Haukadal 1556-57 næstan eftir að hann hafði lagt niður biskupsstörfin. Þó segja aðrir að laugar þessar dragi nafn af því að þær væri í pápisku helgaðar Marteini frá Tours sem var kallaður helgur maður og var mjög dýrkaður eins hér á landi og annarstaðar.