Grýlukvæði séra Guðmundar Erlendssonar

Úr Wikiheimild
Jump to navigation Jump to search
Grýlukvæði
höfundur Guðmundur Erlendsson
Hér er komin Grýla
og gægist um hól.
Hún mun vilja hvíla
sig hér um öll jól.


Hún mun vilja hvíla sig,
því hér eru börn;
hún er grá um hálsinn
og hlakkar eins og örn.


Hún er grá um hálsinn
og hleypur ofan í fjós,
hún vill ekki horfa í
það hátíða ljós.


Hún vill ekki heyra
þann hátíðasöng;
kvartar hún um ketleysi
og kveðst vera svöng.