Sálarskipið

Sálarskipið
Höfundur: Bólu-Hjálmar

Sálarskip mitt fer hallt á hlið

og hrekur til skaðsemdanna,

af því það gengur illa við

andviðri freistinganna.

Sérhverjum undan sjó ég slæ,

svo að hann ekki fylli,

en á hléborðið illa ræ,

áttina tæpast grilli.

Ónýtan knörinn upp á snýst,

aldan þá kinnung skellir,

örvæntingar því ólgan víst

inn sér um miðskip hellir.

Bítur fyrir mér nesin naum,

í Naustavík hjálpar hvergi,

óláns því hrekst í stríðan straum

og steyti á smánarbergi.

Sundur þá leysir feigðar flök

og festir í jarðar iðri,

eitthvað burt flæmist öndin slök,

illverka reifuð fiðri.

Sýnist mér fyrir handan haf

hátignarskær og fagur

brotnuðum sorgar öldum af

upp renna vonar dagur.