Íslenzkar þjóðsögur og æfintýri/Galdrasögur/Óvild Fúsa og Sigurðar Dalaskálds
Sumir segja það hafi verið upphaf til óvildar þeirrar er varð millum Sigurðar Gíslasonar Dalaskálds og Leirulækjar-Fúsa að einhveriu sinni hafi Sigurður verið í smiðju að dengja ljá, en kona hans hafi komið út í smiðjuna og sagt honum að koma inn og borða skattinn; hafi þá Sigurður kastað fram vísuhelming þessum:
- Húsmóðir er Þórunn þekk
- þjónar (þénar) æru og dyggðum.
Þá hafi Fúsi átt að koma að í því og bætt við seinni hlutanum:
- Fekk hún vondan flærðarrekk
- fremst úr Dalabyggðum.