Íslenzkar þjóðsögur og æfintýri/Galdrasögur/Dóttir Sæmundar og kölski

Íslenzkar þjóðsögur og æfintýri (1862)
Dóttir Sæmundar og kölski

Sæmundur fróði átti dóttur eina. Einhverju sinni þá Sæmundur var ei heima kom til hennar satan og sagðist eiga að taka hana. Stúlkan var þá stödd í lofti nokkru að reiða upp sæng föður síns. Hún sagðist skyldi með honum fara ef hann væri búinn að telja allar fjaðrirnar í sænginni hans föður síns fyrr en hann kæmi heim, en annars ekki. Satan játaði því og varð nú heldur hraðhentur, en í því bili sem hann hélt á þeim seinustu í hnefanum kom Sæmundur upp í stigann. Þá þorði ei satan við að standa og slapp hann því af stúlkunni í það sinni.