Íslenzkar þjóðsögur og æfintýri/Galdrasögur/Eiríkur krafinn kaupstaðarskuldar
Eiríkur krafinn kaupstaðarskuldar
Hafnarfjarðarkaupmenn sendu Eiríki presti eitt sinn klögunarbréf og báðu hann koma og borga 80 ríkisdali er hann hefði lengi verið skuldugur um. Nú var hann í vanda staddur því hann átti ekkert til að borga með. Hann reið þó suður og finnur kaupmenn og spyr hvurnig á því standi að hann sé skuldugur. Þeir báðu hann sjá það í bókinni. Hann tók við og leit á og mælti: „Ég sé það ekki heillin góð; ég sé svo illa; ég verð að fara út að glugganum.“ Þeir lofa það. Hann víkur sér frá þeim og að glugganum og horfir á bókina um stund og mælti síðan: „Jafnt er sem ég vissi, ég á hér inni 80 ríkisdali, en er ekki í neinni skuld. Nú skal klaga ykkur fyrir lygina eða þið megið bæta.“ Þeir líta á bókina og bregður í brún er þeir sjá að bókstafirnir hafa snúizt í dálkunum og segir prestur nú satt. Þeir óttuðust og buðu honum 100 ríkisdali að klaga þá ekki. Hann játar því og síðan gaf hann þeim upp helming alls þessa.