Íslenzkar þjóðsögur og æfintýri/Kímnisögur/Þeirra orða var mér þaðan von

Úr Wikiheimild
Jump to navigation Jump to search

Prestur spurði börn á kirkjugólfi að Ingjaldshóli. Hann spyr eitt barnið að því hver hefði innleitt syndina í heiminn. Barnið þegir og svarar engu; þá heyrir prestur að sagt er í kórnum: „Má ég ekki svara fyrir barnið?“ „Hver má svara sem vill,“ segir prestur. Þá segir kórbúinn: „Heilagur andi gjörði það.“ „Hver svaraði?“ mælti prestur. „Þorvaldur Grímsson,“ mælti hinn. „Þeirra orða var mér þaðan von,“ mælti prestur. Þá segir Þorvaldur við sessunauta sína: „Haldið þið piltar að honum hafi ekki þótt vænt um?“