Íslenzkar þjóðsögur og æfintýri/Kímnisögur/Mjólkin, flotið og áin Fjórtán
Einu sinni áttu karlar þrír tal með sér um ýmsa hluti; þar kom og að þeir fóru að tala um hvaða matur þeim félli vel. Segir þá einn þeirra: „Góð er mjólkin, guð var í henni skírður.“ „Ósatt er það,“ segir annar, „í flotinu var hann skírður, blessaður.“ „Ekki er það heldur sannara,“ sagði hinn þriðji, „hann var skírður í ánni Fjórtán.“